李斯特城有「路」可尋

李斯特城有「路」可尋

究竟係咪摩連奴唔識打漂亮足球呢？英超周中補賽，車路士早幾日作客酋長，守足一個下半場，俾阿仙奴班球迷大叫「BORING、BORING」，賽後再俾班記者口誅筆伐，我哋旁觀者就開心啦，難得又見摩連奴發揮串王本色，而周中呢場作客李斯特城嘅比賽前，班記者佬仍然唔心死，繼續想迫摩連奴講錯嘢，不過摩連奴都話知你，講明呢場對李斯特城一樣唔需要贏，下場主場對水晶宮攞3分就得，又係嘅，車仔差5分稱王，摩帥既然咁講，咪信佢一次捧李斯特城囉！（周三33，now621台周四2:45am直播）

車仔作客阿仙奴，一早都知場波冇咩好睇，反而場邊兩個教頭牙齒印咁深，梗有啲火花啦；點知賽後啲焦點就去晒摩連奴度，唔少人連埋英國眾傳媒都批評佢，話佢淨係識守冇皇者風範，不過正如摩連奴話齋，你寧願好有娛樂性咁十年無冠，定悶悶哋慶祝攞聯賽冠軍先？雲格梗係冇聲出啦！而到咗周中對李城場波前，又有記者話阿巴莫域治不滿摩帥打功利足球，一聽都知流啦！不過摩帥嬲到即時反擊，話老闆不知幾咁滿意球隊表現，咁我又信喎，係人都知呢兩年阿巴一毫子都冇攞過出嚟，車仔今年又有盈餘，季尾有兩隻盃落袋，有咩可能唔滿意先？

摩佬：有1分都滿意

而摩連奴賽前再補充，佢季初打李斯特城時，己經覺得呢一隊係好球隊，又有好多好球員，所以佢哋近戰連贏4場脫離降班位置，佢一啲都唔驚訝，而面對勢強嘅主隊，佢話攞1分都好滿意，而事實又係喎，李斯特城近期勢如破竹，近5場攻入11球，呢個火力都已經唔係一隊護級球隊應有嘅攻力，當中華迪幾乎場場有波入，而李城領隊皮亞臣都係撐摩連奴嘅，因為佢都話成績緊要過一切，呢場一定會盡力喺車仔身上取分。

迪亞高哥斯達可候命

事實上，車仔係咪唔識攻？邊有可能先，單係一個全年最佳球員夏薩特，已經係入球保證，今場迪亞高哥斯達又可以復出，同埋大家要公道啲，車仔季初大炒愛華頓6:3、炒史雲斯4:2，邊場唔係進攻足球先！季尾球員體力分配重要，摩帥睇餸食飯無可厚非，不過既然你話佢唔識攻，摩帥條氣唔順呢場多數攻俾你睇，李城一向又係有前冇後，呢場和還和，好有可能係一場大比數嘅和波，2:2、3:3都唔出奇架！