卡爾萬 ：獅吼收韁博「讓客」啱素

留力季後賽同亞冠盃
布里斯班獅吼穩奪澳職季後賽入場券後，對常規賽重視程度明顯下降，周中飛去北京出戰亞冠盃前嗰場聯賽，教頭法蘭斯泰積臣仲收起大批主力。佢哋今日喺常規賽收爐戰迎戰紐卡素噴射機，為備戰季後賽同埋亞冠盃，隨時又試收韁唔去，讓波點捧得落手？一於博噴射機2.12倍「讓客」。

（有線64、203周五下午5:40直播）

獅吼輪換上場出8後備
獅吼上場聯賽不敵墨爾本勝利，教頭法蘭斯泰積臣作出8個正選調動，賽後佢被追問原因時解釋：「我好希望場場贏晒，但做教頭嘅要識得靈活變通，亦要顧及好多嘢。」講白啲即係話常規賽已無關痛癢囉！睇怕啱啱踢完亞冠盃嘅主將卡路查奴域、麥特麥基同布萊治等今仗隨時被收起，改由一班生牯仔應戰，玩輪換戰術你話點撐得過先？

噴射機艾臣蒙達路當弗
紐卡素噴射機喺聯賽包緊艇，因為澳職冇降班制度，依家名副其實踢緊風流波。雖然係咁，幸佢哋近期表現偶有驚喜，除咗試過作客擊敗尾二嘅西悉尼流浪者外，仲爆大冷撼贏埋爭做常規賽盟主嘅墨爾本勝利。再講吖，噴射機首席射手艾臣蒙達路收咧前當弗，連續兩場有斬獲，今場莫講話受讓值博，隨時偷雞贏埋都仲得！