科娜 ：維拉撞紅 不落下風

舒活醫番好 頹廢大隻佬
只差兩步，利物浦「神奇隊長」謝拉特就可以喺牛一當日捧起英格蘭足總盃，而今晚就係第一步，紅軍會喺溫布萊球場上戰嘅4強戰迎戰阿士東維拉。維拉雖然喺英超要護級，不過難得殺到嚟準決賽，冇理由喺呢個時候先至放棄啩？喺「廢鋒聖手」舒活嘅「醫治」下，季初頹廢不堪嘅維拉鋒霸賓迪基已經返晒嚟，近排踢到着晒火，勢將阻住「謝四」嘅生日捧盃夢，皆因紅軍後防就最驚呢類大隻佬射手，維拉受讓一球可捧下盤！

（now 633周日晚10時直播）

賓迪基反彈狂入波
「廢鋒聖手」舒活無論係教熱刺定維拉，兩軍頹爆前鋒艾迪巴約同賓迪基都一樣鹹魚翻生。喺舒活接過熱刺帥印之前，艾迪巴約被上一任教頭保亞斯長擺雪櫃，但舒活嚟咗之後，獲解凍嘅艾迪巴約出賽24場入14球。到今季呢位「廢鋒聖手」嚟到維拉，就輪到賓迪基受惠，呢位24歲比利時大隻前鋒重傷過後踢極都踢唔起，舒活嚟之前18場只入3粒，勢估唔到喺舒活調教下，賓迪基近5仗就入咗7球，反彈力度非常恐怖。

畀大隻中鋒恰死可以話係利物浦嘅「傳統」，防線總係唔夠硬淨，以前就有車路士杜奧巴，近幾年就輪到迪亞高哥斯達同賓迪基撞散紅軍，自從賓迪基喺12年夏天加盟維拉，過去6戰紅軍一共入咗4球，當中包括12年12月一戰，維拉作客晏菲路球場，賓迪基梅開二度，助維拉完勝紅軍3比1。今次仲要對住近期弗到漏嘅賓迪基，紅軍真係唔死都一身潺！

利記晉級欠說服力
雖然話利物浦上下一心想贏個足總盃返嚟做送別謝拉特嘅禮物，但其實紅軍喺今屆足總盃嘅晉級過程一啲說服力都冇，對住英冠嘅保頓同布力般流浪都要重賽，仲要贏得好驚險，喺英超連輸畀曼聯同阿仙奴後更加打窒咗道氣，上周贏到紐卡素只不過係因為「喜鵲」太頹而已。呢場4強冇得重賽，和波就要加時甚至互射12碼，科娜認為維拉依家士氣高昂，法定時間應可保住不敗，甚至入埋決賽都唔令人意外，下盤值捧。