阿占：漢堡梅到爆繼續反

4換教頭 球員內訌
從未降班嘅德甲「老字號」漢堡，上季死裏逃生保住甲組席位，不過要面對嘅始終都要面對，漢堡聯賽連輸4場後已經跌落榜尾，士氣低落之餘仲爆出球員內訌，日前臨時請嚟今季第4個教練拉巴迪亞打救，呢個爛攤子睇怕都唔係一朝一夕可以救得番，今晚佢哋作客雲達不來梅凶多吉少，受讓平半都要唔過，不來梅1.69倍上盤咪嫌熱。

（有線61、64、201及203周日晚9:30直播）

佐羅 比哈美更衣室打交
漢堡上場吞禾夫斯堡兩蛋後聯賽4連敗，不勝走勢增加至8場，亦係連續第5場無波入，最弊係兩名主將佐羅同比哈美被爆喺更衣室打交，嚴重影響士氣，當中中堅佐羅今場更累積黃牌夠數要坐波監，可以話雪上加霜。再者，球隊日前宣布搵拉巴迪亞執掌帥印，雙方簽約15個月，拉巴迪亞係漢堡今季第4個教練，試問球員又點會適應到，踢到咁差只可以怪球隊管理差勁。

不來梅爭歐霸入場券
至於坐擁主場之利嘅雲達不來梅，今季成績算係不過不失，佢哋重用年輕球員嘅政策亦算頗為成功，20歲新星箭頭戴菲沙爾基雖然已落實下季轉投RB萊比錫，但上場聯賽仍然有波入，而19歲中場奧斯杜拿尼今季都有6次助攻，同樣備受注目，雲達不來梅依家要為下屆歐霸盃資格而戰，主場出擊梗係信心保證。

頂占筍盤
雲達不來梅（上盤）