張健峰：巴塞硬仗連場 惡鬥蝙蝠冇優

西甲剩番7輪，榜首嘅巴塞隆拿只領先次席皇家馬德里2分，今晚主場鬥華倫西亞真係不容有失。不過咁喎，「地上最強」啱啱喺歐聯搏完命，7日內應付第3場大戰真係幾惡啃，相信對住「蝙蝠兵團」就算贏都唔會贏得輕鬆，敲中位數係3.5球嘅1.75倍細最明智。

（now632台周六晚10:00直播）

骶髂關節挫傷 小白難披甲
咪以為巴塞同皇馬喺西甲獨大，查實一班力爭來屆歐聯入場券嘅實力分子好似馬體會、西維爾同華倫西亞都唔嘢小。巴塞上輪聯賽對西維爾雖然早早領先兩粒，但最尾就由贏變和痛失2分，證明要兼顧歐聯戰線嘅「地上最強」嚟到季尾唔係橫行無忌，一樣有隱憂。

尼馬同蘇亞雷斯搵番射門鞋，美斯踏入2015年亦都大勇，巴塞「MSN」組合係得人驚，但佢哋並唔係鐵打，球隊周中先喺歐聯造訪完巴黎聖日耳門，7日內應付第3場大戰絕對唔易踢。況且據巴塞官網透露，中場恩尼斯達被證實有「較嚴重嘅骶髂關節挫傷」，今仗上陣機會唔大，無疑削減咗巴塞嘅中前場組織能力。

反觀華倫西亞冇歐洲賽踢，以逸待勞，體能上自然較巴塞佔優，況且佢哋已經連續10仗保持不敗，好鬼硬淨。「蝙蝠兵團」仲要同馬體會同西維爾爭來屆歐聯入場券，今仗同樣夠晒鬥心。從首循環佢哋輸畀巴塞0:1所見，雙方都踢得好保守，預計華倫今晚作客唔慌會踢得進取，實會畀心機做好防務工作，再搵機會偷雞，咁樣梗係有利入球細啦！