劉舜文：慕遜法福炮製：「雙攻」紅燒肉丸子

「今晚『德甲』食乜餸呀，舜文？」球迷興致勃勃地問。「係法蘭克福同慕遜加柏古法炮製嘅：『雙攻』紅燒肉丸子呀！」我爽快回答。顧名思義，所謂「雙攻」就是「雙方鬥攻」的意思，就算兩邊後防出盡「無敵鴛鴦剷」，恐怕入球仍然像落了熱鑊的花生油一樣：「滾滾而來！」球迷又問：「慕遜加柏聯賽四連勝兼且攻入11球，過程複雜唔複雜呀？」我衝口而出：「唔夠你咁複雜！」的確，就算慕遜加柏早前作客擊敗拜仁、抑或上周擊退多蒙特，過程看來也是很簡單似的。

靴爾文拉菲爾着晒火
說到近期最火的慕遜加柏球員，當然非靴爾文及拉菲爾基達奴莫屬。靴爾文近4仗貢獻了4個入波2個助攻，拉菲爾近3場亦攻入4球。上周對多蒙特，靴爾文就煮了一道名菜「靴爾文爆衝花」——狂爆狂衝大半場後再化身「你敢傳」師傅，妙傳給拉菲爾入波，大家都不禁高呼：「好火！啲火係咁上呀！」今晚靴爾文於右路面對的，偏偏是出名攻強守弱的左閘奧薛卡，恐怕全德甲失球最多的法蘭克福後防，隨時又再肚瀉不止。

比較可惜的是，法蘭克福的「好味老油條」美亞突然膝傷提前收爐，中場的「天才小廚師」史頓達拿亦需停賽，影響了球隊爭取入波甚至「有雞汁」的機會。不過，慕遜加柏後防大將史蘭斯亦因傷倦勤，要知史蘭斯今屆缺陣9場，球隊從未吃過「清白刺身」呢！

說到這裏，球迷又問：「我驚雙方攻勢太多，啲波好似啲滾油咁，彈到我喎！」我一邊奸笑、一邊霸氣地回應：「我都係想咁啫！」是的，今晚雙方無論是否「話明唔好肢體碰撞」，照計這道「『雙攻』紅燒肉丸子」，必定美味可口。各位，起筷喇！

(有線61及201台周六凌晨2時30分直播)