走肖：噴射機主場謝幕 大戰悉尼

澳職鬥到最後直路，紐卡素噴射機今日喺主場對FC悉尼，一於玩1.62倍入球大。由於澳職不設降班，噴射機今季最後1次主場出戰，相信會放低包袱踢場好波畀球迷睇，加上悉尼射手真高獲得高薪續約，佢肯搏唔憂冇波入！

（有線64、203周五下午5:45直播）

搶分避免聯賽包尾
雖然噴射機唔會降班，不過佢哋依然要搶分，避免被包尾嘅西悉尼流浪者過頭做包尾大幡，主場謝幕戰冇理由揸流攤。或者大家會覺得，噴射機前線入球能力勁曳，最近仲有後衞史葛尼維利傷埋，幸射手艾臣蒙達路上仗打破咗11場入球荒，配合埋呢班波進取嘅踢法，隨時上演入球騷都未定喎。

真高獲千萬年薪續約
FC悉尼上星期作客3:0打沉珀斯光輝後，依然落後榜首嘅墨爾本勝利3分，要爭常規賽冠軍形勢上非勝不可。冇錯，悉尼有唔少主力養傷，好在射手史美斯停賽2場後可以候命，況且中鋒真高得到球會開出140萬美元（約1,085萬港元）年薪續約，無論佢想留低定跳槽，都要入波證明實力啦！