Mic少：基輔戴拿模打殘廢倫

歐霸盃8強首回合，烏克蘭霸班基輔戴拿模主場對意甲費倫天拿，近年被同國死敵薩克達搶晒風頭嘅基輔戴拿模，自上年由名宿列布夫執教後，終於重拾霸氣，聯賽高踞榜首，歐霸盃亦表現突出，今屆5次主場出擊，都可淨贏對手兩球或以上，夠晒說服力，今仗僅小讓後勁不繼嘅費倫平半，上盤抵玩。

（有線62及202台周五凌晨3時05分直播）

基輔戴拿模最威水時期必數99年，舒夫真高孭飛打入歐聯4強，但近年無以為繼，甚至連國內王者地位都被薩克達取代。會方上年大刀闊斧改革，包括起用冇教波經驗嘅列布夫領軍。呢位40歲少帥就係當年舒夫真高嘅鋒線好拍檔，屬於球隊「神級」人物，憑個人魅力已足以喚醒球員鬥心。

費倫天拿連吞兩場3蛋
列布夫球員時代唔止喺歐聯有風光日子，亦去過英超搵食，大賽經驗豐富，基輔喺佢執教下，踢歐霸盃有板有眼，5次主場贏晒，包括上圈大炒愛華頓5比2，可見即使歐洲主流聯賽球隊去到當地比賽都冇運行。

費倫天拿近期連遭重創，先係意大利盃吞祖記3蛋出局，上仗聯賽又大敗畀拿玻里3球，進軍下屆歐聯機會大受削弱，難免影響軍心。屋漏偏逢連夜雨，費倫今場仲有後防主力荷西巴辛達停賽，更難抵擋主隊強大火力。