蘇斯黑柴 ：歐霸4大熱門困獸鬥

西維爾着晒火贏特
歐霸8強戰首回合今晚開打，偏偏禾夫斯堡、西維爾、拿玻里同辛尼特呢四大熱門抽籤撞到應，分兩場捉對廝殺，精彩戲碼提早上演，絕對係球迷之福。

今晚西甲西維爾主場對俄超辛尼特，衞冕嘅西維爾近期着晒火，全隊上下有超強信心複製上屆成功，今晚主場面對有大半隊主力缺陣嘅殘兵辛尼特勝券在握，西維爾讓半一，黑柴強捧上盤。

（有線64及203台周五凌晨3時05分直播）

西維爾今季狀態起落大，尤其今年年初接連輸波，不過佢哋始終夠級數，去到三月終於重返高峰，球隊喺三月初至本月初保持西甲同歐霸直落七連勝，直至上輪聯賽對巴塞隆拿，仲有本事喺兩球落後劣勢下逼和對手，對全隊嚟講無疑係最大強心針，今場強勢強陣主場出擊，有信心擊退辛尼特向衞冕之途挺進。

辛尼特超殘作客等劏
辛尼特雖係俄超一哥，但近期狀態麻麻，上輪聯賽主場對魯賓卡山都要失分，而且陣容超殘，今場右閘施莫尼哥夫、左閘基斯薛圖、中場丹尼艾維斯同鋒將侯克四大主力齊齊停賽，中場法素林膝傷缺陣，加埋養傷多時嘅中場安約高夫、前鋒艾沙維同基沙哥夫都難趕及復出，大半隊主力都唔踢得。何況佢哋踢歐洲賽作客成績十分曳，今季喺歐聯同歐霸作客已經先後輸過畀AEL利馬素、利華古遜、摩納哥同拖連奴，佢哋一向都倚靠嚴寒嘅主場搵食，今晚殘陣作客去到悶熱嘅南西班牙，面對大勇嘅西維爾相信凶多吉少。