笛子波童：羅斯郡係咁升贏到唔識停

今晚有場蘇超直播羅斯郡作客鬥聖美倫，羅斯郡近八場聯賽七勝一和，由原本包尾大幡跳升至現時處於護級安全區，氣勢一時無兩，面對四連敗愈踢愈沉嘅聖美倫，作客讓平半照捧上盤。

（TVB 301周二凌晨2時45分直播）

羅斯郡季初表現不濟，上半季大部分時間都處於聯賽榜包尾，不過自從球隊喺一月份簽入英格蘭前鋒居倫後，演出即告脫胎換骨。

呢名曾經喺英甲搵食嘅前鋒首次為羅斯郡上陣即有士哥，助球隊作客打和登地，然後由二月份開始，帶領球隊打出一輪八場聯賽贏七場嘅走勢，個人入咗四球之餘，亦激活埋利姆保斯、迪維泰等前鋒，令球隊喺八場比賽場場有士哥，合共入咗十五球，由包尾位置升上現時第十位，領先今場對手聖美倫十三分，同時亦比尾二嘅馬瑟韋爾多三分，隨時護級附加賽都唔使踢，信心、狀態指數同處高峰，今場可以反客為主。睇埋個盤，羅斯郡作客都要讓波咁辣，擺明莊家都睇好。

聖美倫剛吞五蛋食滯晒
相反聖美倫近期愈踢愈沉，聯賽四連敗之餘，已經連續四場冇入波，上場對住尾二嘅馬瑟韋爾竟然淨吞五蛋，士氣受嚴重打擊，就算主場出擊都信唔過。