Mic少：紅軍打鵲報細數

聯賽冇望 慳番啖氣爭盃仔
今輪英超壓軸戰，利物浦主場對「喜鵲」紐卡素，「紅軍」經過兩場關鍵大戰輸畀曼聯同阿仙奴之後，想打入前四位玩下屆歐聯嘅機會已經好微，球隊難免洩氣，餘下賽程應會將重心放喺足總盃；加上史達寧去留成疑，史杜列治腳風唔順，無力大勝紐卡素，主Ｗ1.27倍冇肉食，讓主又高風險，寧願博2.1倍入球細。

（now 621周二凌晨3時直播）

紅軍踏入三月後表現一直麻麻，除咗不敵曼聯同阿仙奴，即使鬥史雲斯亦踢得好辛苦，僅贏1比0。上周中足總盃重賽，對手只係英冠球隊布力般流浪，但都係再次「煲魚生粥」。鋒線球員繼續冇貨交，史杜列治經歷上半季傷患纏擾，始終未能重拾昔日水準，史達寧續約問題上「跳草裙舞」，搞到自己心神恍惚之餘，亦打擊隊友士氣。

根據現時形勢推測，英超前四離唔開車路士、阿仙奴、曼聯及曼城。利物浦喺聯賽戰線難有作為，隨時已萌生「收咧」心態，不如慳番啖氣，全力爭足總盃冠軍更加實際，所以唔好奢望紅軍今仗會去盡搶分。

紐卡素Hea踢等收咧
至於紐卡素季中由卡華接手領軍後，表現未好過，佢只屬過渡性人物，下季好難有得留低，球員自然唔會為佢賣命。紐卡素近四場輸晒只入一球，好大程度上因為柏比斯施斯上月初同曼聯後衞莊尼伊雲斯互吐口水，因而被罰停賽有關，呢位射手今場仲要繼續坐波監，睇怕「喜鵲」都係無力翻身，加上紐卡素同降班線有一段距離，球員唔會有太大危機感，隨時繼續Hea踢捱完今季算數。