亨格比利 ：QPR車路士鬥攻 上演大龍鳳

關鍵殺手 Vs 翻版美斯
今晚英超爆發「西倫敦打吡」，昆士柏流浪（QPR）將會喺蓮花路球場迎擊「一哥」車路士。水深火熱嘅QPR好大想頭，隊長祖爾巴頓講明要炮製爆冷賽果，相信有「QPR版美斯」馬菲菲臘斯為查理柯士甸鋪橋搭路，實會同由「關鍵殺手」雷米領銜嘅車路士鋒線做大騷，1.68倍「大」趁熱食呀喂！

（now621台周日晚8:30直播）

之所以話馬菲菲臘斯係「QPR版美斯」，皆因呢位蘇格蘭翼鋒踏入2015年之後強勢爆發，迄今已經有7次助攻，歐洲5大聯賽入面僅次巴塞「球王」美斯（8次），話佢喺QPR嘅作用等同美斯喺巴塞咁重要真係冇誇大。睇番數據，QPR係下游分子入面「士哥」最多嗰隊，首席射手查理柯士甸近期走出小低潮，最近連續兩仗有波入，就連過氣「三獅兵」森莫亞都翻生，呢個攻擊鐵三角絕對唔講得笑。

QPR隊長揚言拆車
QPR要為護級而戰，近期搏晒老命搶攻，接連喺西布朗同維拉身上搶到分之後，隊長祖爾巴頓雄心壯志，賽前話「既然水晶宮贏得曼城，點解昆士柏贏唔到車仔？」，照佢咁講，今鋪似乎想同「藍戰士」駁火咁話喎！

車路士前鋒雷米倒戈
距離昆士柏流浪僅4英里嘅車路士，未來兩仗要硬撼曼聯、阿仙奴，為鞏固榜首席位，今仗當然唔會放過QPR。雖然迪亞高哥斯達養緊傷，幸今晚倒戈相向嘅雷米，近兩仗都攻入救命「士哥」幫球隊全取3分，睇得出車路士火力依然咁堅。況且QPR有前冇後，58個失波冠絕英超，上仗面對出名鋒力弱嘅維拉都3度失守，「藍戰士」想入波易過借火，撞正QPR又唔識死話要爆冷，呢場大龍鳳實做得成。