樂比堅尼：紅鑽欺善怕惡 搞唔掂川崎前鋒

（日）9 川崎前鋒 Vs 浦和紅鑽
日職踢咗4輪，各隊實力有幾多斤両已初步現形，浦和紅鑽雖然以3勝1和排榜首，但戰績佳都係因為對手曳，表現並冇想像中咁好，加上日職亞冠兩線作戰分散戰力，今日下晝作客「剋星」川崎前鋒有暗湧，平手盤撐主隊！

（有線61及201周日下午4:00直播）

浦和紅鑽係馬會日職冠軍大熱，目前得2.6倍，不過近年日職各隊水平非常接近，淨係睇過去4季竟有2季由升班球隊奪標，就知競爭幾咁激烈，最終真命天子誰屬，現階段實在難以估計，尤其係今屆實施附加賽制度，增添更多變數，紅鑽係咪值得咁熱，老實講樂比係抱懷疑態度。

紅鑽攻力欠銳
首先紅鑽今季聯賽3場勝仗，對手湘南比馬、松本山雅及山形山神全屬升班球隊，當中只有湘南比馬具中游實力，其餘兩隊相信要為護級而戰，紅鑽贏波可謂合情合理，唔算話特別叻，但當紅鑽一遇實力較強對手，好似日超盃對大阪飛腳即吞兩蛋，佢哋亞冠4場分組賽亦僅得1和3負劣績，可見紅鑽班底未必經得起考驗。

事實上，紅鑽畀人感覺係防守尚算可以，但攻力明顯欠銳，新加盟嘅斯洛文尼亞前鋒隆比真歷仲未融入球隊，李忠成又狀態低迷，兩人喺聯賽仲未開齋，至於最可靠嘅射手興梠慎三早前受傷，雖然已復操，但今仗踢唔踢得係未知之數。

川崎對賽佔上風
反觀川崎前鋒季初狀態唔錯，尤其係射手大久保嘉人已射入5球，佢同巴西外援雲拿天奴都係紅鑽剋星，兩人近4次主場對紅鑽加埋射入10球，協助川崎前鋒主場連贏紅鑽4次，由於兩隊人腳變動唔算大，呢個對賽成績絕對有參考價值。

樂比推介：川崎前鋒（平手）