combo king ：蒙特維多流浪咪走保

南美自由盃分組賽來到尾聲，投注前最緊要睇清楚出線形勢，第5組阿根廷勁旅小保加已經獲得出線資格，今仗作客烏拉圭球隊蒙特維多流浪，隨時揸流攤。小保加讓半一全因「名牌效應」，阿King撐蒙特維多流浪下盤。

（周五早上8時45分開賽）

小保加肯定晉級唔搏
小保加四戰全勝肯定晉級十六強，相信球隊會將重心放番喺聯賽，尤其係現時阿甲幾支前列球隊咬得好緊，小保加榜首位置唔穩陣，必須搏盡保持領先優勢。權衡輕重之後，今仗派副選出戰自由盃亦好合理。

至於蒙特維多流浪現時同小組次席柏利斯天奴同分，雖然話蒙軍踢少一場，但如果今場輸波，將會優勢全失；就算贏唔到起碼都要攞到一分，先至可以接受。蒙特維多流浪今屆兩場勝仗都係主場取得，水準有保證，足以抵擋戰意成疑嘅小保加。

另一支阿根廷球隊學生隊喺第7組主場對哥倫比亞球隊國民體育會，學生隊贏波就可出線，況且國民體育會狀態低迷，近五場輸四仗，學生隊正好趁機搶分。第1組巴西球隊明尼路瀕臨出局，今仗主場對哥倫比亞球隊聖達菲，屬於爭出線「六分波」，預料雙方會互相駁火，捧大盤。