九叔：紅鑽壓力大 讓唔起北京

浦和紅鑽今日主場都贏唔到嘅話，理論上就要同亞冠盃講Bye Bye，所以焗住要強攻來訪嘅北京國安（足智彩譯FC北京），問題係計人腳逐個秤，國安始終高些少，浦和讓半一略嫌多咗啲，都係博番1.64倍國安下盤着數。

（now671台周三晚6:30直播）

國安目前喺G組3戰全勝帶頭，浦和就3戰皆北零分包尾，國安嘅情況係一贏出線，和都冇乜壞，輸亦冇乜危機，相反浦和一輸就差唔多可以執定包袱，論心理壓力，呢支日職領頭羊大好多，後衞槙野智章話「只得1%機會我哋都要爭取贏波」，呢番說話就睇到佢哋幾咁緊張，雖然由另一個方向諗，佢哋好有決心，似乎係件好事。

北京13次鬥日本球隊僅兩敗
但係有一個事實係，國安向來唔赦日本球隊，總計响亞冠盃13次出戰東瀛隊伍，只係輸過兩次，當中6次作客係1勝3和2負，換言之有6成幾嘅比率唔使輸。最重要一點係，佢哋「3支洋槍」─丹贊奴域、費祖拉烏同巴塔拉，近期表現好Sharp，尤其費祖拉烏仲做埋國安宣傳海報嘅主角之一，浦和焗住進攻，好易畀到空間呢「3支洋槍」發難。當然，國安件右中場張呈棟傷咗冇隨軍，要由喺巴甲哥連泰斯浸咗兩年嘅陳志釗頂替，側擊力略為打折扣，不過隊長徐雲龍可以復出鎮守後防，一定程度上強化咗國安打穩守突擊嘅本錢。

浦和企得响日職榜首，自然唔會係弱嘢，但係前鋒興梠慎三剛啱至傷愈，表現冇乜保證，除非畀人形容為「原口元氣（家陣踢緊德甲哈化柏林）第二」嘅23歲前鋒高木俊幸，突然有神來之筆，否則浦和憑乜嘢玩強攻呀？博國安下盤啦。