高普上任仲未執掂 希臘回師主場細守城池_東方日報

歐國聯A2組第4輪賽事，由希臘返主場再鬥德國。雖然德國上仗贏波，新帥高普終於開齋，但前線把握力問題未見解決，希臘頭3輪未輸過，不過王牌謝索利斯受傷令攻力受削，今仗會先做好防守，寧捧2.5球入球細。（周一凌晨2時45分開賽）文:法達斯維

高普上任仲未執掂德國
德國世盃後搵來名帥高普上任，點知頭2輪歐國聯只得1和1負，包括主場輸畀希臘，令人跌晒眼鏡。德國去到上仗憑域斯入波兼助攻，以2比0擊敗塞爾維亞，總算為球隊同高普開齋，不過塞軍早已今非昔比，而「日耳曼兵團」全場狂攻作出30多次埋門，只得8次中目標兼入得兩粒，箭頭禾達美迪更加上演近門炒飛機，正正係德國頻頻失機嘅縮影，佢哋近4場全開2球或以下，單計鋒線高普都有排執。

另邊廂，希臘頭3輪歐國聯取得2勝1和，上周作客德國贏1比0，更係佢哋首次擊敗呢支勁旅，士氣大振，上仗主場對荷蘭一度領先2粒，但翼鋒謝索利斯傷出後，下半場畀「橙軍」連追2球扳平，而謝索利斯今仗因傷倦勤，對側擊影響甚大，對住急於復仇嘅德國，必定沿用上次作客嘅戰術，繼續擺鐵桶陣，等一個機會先拮你一刀，唔慌多波入，一於捧入球細。