Combo King ：史雲頓爭直升必搶

布城收夠籌 讓波捧對家
英甲今晚續演復活節快車，榜首布里斯托城爭取直接升班已坐定粒六，對上兩場聯賽失分全因心態問題，今晚佢哋主場迎戰仍有機會爭入頭兩名嘅史雲頓，以近期「布城」hea踢走勢再次失分唔奇，史雲頓淨係鬥心都值捧，阿King推介讓球客勝。

（TVB 301周三凌晨2時45分直播）

未計周一晚比賽，布里斯托城領先少踢一場嘅「三哥」米爾頓凱恩斯13分，就算冠軍未落袋，頭兩名嘅直接升班資格都可以話係好穩陣，所以對上四場聯賽只得一勝、演出稍為失準可以理解。

史雲頓現時排第四位，落後次席嘅普雷斯頓七分但少踢一場，仍然有機爭上前兩名直接升班，搶分決心比主隊有過之而無不及。睇番今季作客表現，史雲頓十九戰取得十勝四和五負，成績僅次布里斯托城排第二，陣中除咗擁有今季射入20球嘅射手安迪威廉斯，仲有年初協助澳洲贏得亞洲盃冠軍、賽事最佳球員盧安高壓陣，論個人級數隨時屬英甲頂班，就算作客都有周旋之力，讓球客勝值得捧場。

唐卡士打風流波要反
另一場英甲錫菲聯主場鬥唐卡士打，唐卡士打既冇降班危機，亦難爭上前列，近四場輸三場似已無心戀戰，捧主場出擊嘅錫菲聯。（周三凌晨2時45分開賽）最後法甲獨腳戲摩納哥主場鬥蒙彼利埃，雙方近期狀態都好弗，兩軍射手安東尼馬迪爾及巴里奧斯頻頻有入波，一於捧大盤。

（周三凌晨1時開賽）