Mic少 ：里奧艾維首回合拉住布先

葡萄牙盃4強首回合，布拉加主場鬥里奧艾維，用聯賽成績計，布拉加高對手一班波，但踢盃賽情況又唔同，里奧艾維上季打入葡盃及葡聯盃決賽，堪稱「盃賽專家」，加上球隊狀態正值巔峰，早前葡超更力挫賓菲加，今仗獲受讓之利，讓球客勝值捧。

（有線155台周三凌晨3時15分直播）

里奧艾維上季葡盃及葡聯盃晉級過程中，都淘汰過布拉加，可見佢哋應付盃賽確係有計。值得一提係里奧艾維上季喺呢兩項盃賽決賽，都輸畀賓菲加，但佢哋剛於上月中聯賽就以2比1擊敗呢支葡超榜首勁旅，成功報仇之餘，亦大大提升信心，今仗即使作客，亦有力同布拉加拉成均勢。

布拉加近況曳爆
布拉加狀態麻麻，近4場比賽有3場冇波入，上仗聯賽遇上尾二嘅基維辛迪先至贏到波，表現令人失望。睇番布拉加近3次主場對里奧艾維，都係贏得一場咁大把，而且首回合雙方或會以試探為先，唔會太過冒進，以免輸壞個頭。預料會係一場拉鋸戰，里奧艾維受讓比較着數。