費倫天拿風捲殘「雲」

費倫天拿風捲殘「雲」

意大利盃4強次回合賽事，今晚瞓身都要支持費倫天拿，事關佢哋呢期狀態大勇，加上首回合已領先祖雲達斯2:1，回師法蘭基主場更覺穩陣，一於捧紫百合開出「讓主」淘汰斑馬兵團晉級。（周二20，now633台周三2:45am直播）

費倫天拿雖然喺3月頭突然失準慘負拉素，但之後又再重回正軌，至今又累積5場不敗，包括打殘AC米蘭同羅馬，同時間喺歐霸再晉一級，另外上周意甲就輕取森多利亞2:0，除咗由中超回流嘅迪亞文迪有波入之外，車路士借將穆罕默德沙拿亦再表演馬勒當拿式入波，呢位「埃及美斯」加盟後成為紫百合嘅支柱，有傳教練蒙迪拿已提議高層出錢買斷，加上其他好波之人好似阿古蘭尼都持續有貨交，首回合領先2:1嘅費倫天拿返去主場出擊更加難尋敗理。
祖雲達斯5連勝亦唔講得笑，不過佢哋近仗只能小勝熱拿亞同埋安玻里就略嫌欠霸氣，球隊只能靠阿根廷前鋒泰維斯單天保至尊，洛蘭迪同埋西班牙新星艾華路莫拉達嘅水準就有啲飄忽，最重要係中場嘅保羅普巴又傳出會離隊，消息指皇家馬德甲同埋巴黎聖日耳門都拗緊手瓜，或多或少都會影響祖記嘅士氣同埋軍心。

祖記對賽往績蝕底

睇埋交手往績，斑馬兵團近年對紫百合毫無優勢可言，近3次對賽勝和負各一，而近3次作客法蘭基球場亦只係入咗3球，上季意甲更加試過喺領先兩球之下，埋單反輸2:4，再加上祖記形勢上要焗攻，不利佢哋最拿手嘅穩守突擊，所以捧費倫天拿「讓主」包冇錯。