迎戰白禮頓以快打快 曼聯後備兵搶韁開半大_東方日報

英聯盃第3圈上演「英超對決」，由曼聯主場迎戰白禮頓。「紅魔鬼」日前喺打吡戰輸波，領隊卡域克備受壓力，今仗唔可以再喺主場失威，肯定會搶韁入波吐烏氣；對住今季英超入波最多球隊白禮頓，駁火味極濃，1.5球嘅半場大要捧場。

（無綫myTV SUPER周四凌晨3時直播）文:工廠仔

曼聯今季重返歐聯，對本土盃賽重視程度肯定大減，不過為免重蹈上屆「一輪畢業」覆轍，而且要避免喺主場兩連敗，相信今場唔會放軟手腳。何況紅魔鋒線人才鼎盛，班捷文施斯高、約舒亞舒克斯等要為正選而戰，新星JJ加比爾同拉斯亦要把握機會爭上位，加上傷愈復出嘅美臣蒙特，曼聯即使輪換，攻擊線都極有睇頭。

突擊戰術啱胃口
曼聯自卡域克執教後，進攻方面作出唔少改變，但穩守突擊仍然係最拿手嘅武器，對住主守嘅球員可能會出現老鼠拉龜，但對住主攻型球隊，高速攻守轉換就啱晒紅魔胃口，今場對手白禮頓正正就係擅於搶攻嘅球隊，雙方以快打快，入球自然陸續有來。

白禮頓士哥英超最多
白禮頓喺德國少帥靴斯拿領導下，貫徹技術型進攻風格，開季成績理想，試過半場贏阿士東維拉4球、半場贏特林素3球，上場聯賽又5球大炒高雲地利，目前係全英超入波最多球隊。加上白禮頓作客奧脫福往績極佳，近4次作客曼聯竟獲全勝，今場無懼同紅魔鬥攻。翻查兩隊近4次對賽，3次半場總入球開2球或以上，開1.5球半場大機會極高。