鋼鐵防守困鎖車仔 倫敦打吡撐阿仙奴_東方日報

今輪英超爆發激戰，開季同樣兩戰兩勝嘅阿仙奴同車路士，將正面交鋒上演「倫敦打吡」！衞冕嘅「兵工廠」延續上季奪冠氣勢，開咧即展現極佳狀態；「車仔」喺沙比阿朗素領軍下亦煥然一新，雖然進攻力強，但防守仲有唔少漏洞，作客酋長球場難免居下風，主勝值博。（Now 621、622及611周日晚11時30分直播）文:工廠仔

阿仙奴今季引入般奴古馬雷斯、謝索利斯同安斯干沙等新兵，配合原有嘅冠軍班底，合作上完全冇問題，開季先贏曼城捧走社區盾，聯賽再挫高雲地利同阿士東維拉，而且3場比賽未失1球，上場作客阿士東維拉，竟然令對手連中目標嘅攻門都欠奉，防守力極有保證，足夠抵禦車路士進攻。

入埋唔夠後面輸
車路士夏天再次進行換血，摩根羅渣士強勢加盟，加上高爾彭馬翻生，開季兩場聯賽入7球火力強勁，令球迷期望值大大提升。不過，「車仔」日前賣走安素費南迪斯，中場力量削弱，而且球隊防守上仍有唔少問題，尤其3後衞陣式攻強守弱，對住富咸失2球、對白禮頓失3球，靠重火力掩蓋防守甩漏唔係長遠之策。

相比之下，「兵工廠」嘅攻守能力明顯更平衡，整體實力亦佔優，加上今仗有主場之利，贏面自然更高。而且阿仙奴喺呢場「倫敦打吡」往績甚佳，過去3次對住車路士都能夠順利取得勝利，今場有望延續勝勢。