英超：超強火力撲擊葉士域治 利物浦大盤威番鋪_東方日報

英超第3輪賽事展開，打頭陣有新升班嘅葉士域治，主場鬥利物浦。「紅軍」開季唔係咁順，連續兩場都係劣勢下逼和對手2比2，攻強守弱風格明顯，今場對住表現頑強、踢法大無畏嘅葉士域治，再開中位數3.5球入球大機會高。

（Now 621及611周六凌晨3時直播）文:工廠仔

利物浦今季易帥由伊拉奧拿領軍，季前繼續大事增兵，原本已經有域斯、阿歷山大伊沙克同加普等攻擊好手，最近更用1.23億鎊羅致法國翼鋒巴特利巴高拿，加上之前簽入嘅西班牙翼鋒域陀蒙路斯都交足貨，「紅軍」火力相當恐怖。消息指巴高拿今場更有機會首演，佢嘅速度同爆發力唔係人咁品，今場勢必成為葉士域治心腹大患。

不過，「紅軍」喺頭兩輪英超並未贏過波，而且顯示出防線弱點；球隊鋒力係強，不過防守似乎比上季更加表現不穩，兩閘謝利美費林邦同米路斯卻基斯場上發揮重攻輕守，防中得番賴恩格雲貝治頂住，搶截能力明顯不足，兩場聯賽失4球唔係偶然，對住擅打反擊嘅球隊，失球風險仍然好高。

勇字當頭同紅軍鬥攻
葉士域治雖然係新升班，但係球員「勇」字當頭，近兩場主場分別2比1贏新特蘭，同埋3比1贏李斯特城，上場作客曼聯亦繼續採用進取踢法，雖然最終失咗5球錄得大敗，但呢支升班球隊亦喺曼聯身上攻入兩球。葉士域治近4場比賽，3次總入球開4球或以上，今仗返回主場出戰，預計踢法絕不退縮，勢必同利物浦駁火，推介入球大。