法達斯維：水淹曼城做大騷

蝦兵蟹將遇強愈強
今夜深宵英超獨腳戲，衞冕嘅曼城作客火併水晶宮，「藍月亮」啱啱畀阿仙奴同曼聯過咗頭跌落第4位，近日又謠言滿天飛，令軍心不穩，隊長高柏尼大跌Watt，令後防立立亂，遇上對親強隊特別起勁嘅水晶宮，隨時合演入球騷，斯維寧願轉玩大盤。

（now 621周二凌晨3時直播）

高柏尼跌Watt 防線牙煙
曼城早排忽然演出走樣，之前10場聯賽只贏得4場咁大把，唔單止畀一哥車路士愈甩愈遠，加上阿仙奴同曼聯喺上周末齊齊贏波，已反壓「藍月亮」升上第2同第3，儘管曼城只係差佢哋2分及1分，兼打少一場，今晚只要贏波就可以即刻要搶番次席，但以佢哋近期嘅頹勢，搞到主帥比歷連尼都話依家最緊要保住前4喎。又難怪比帥咁講，佢最信任嘅隊長兼中堅高柏尼，今季表現跌晒Watt，頻頻犯下低級錯誤失大意波，上周中歐國外為比利時披甲對以色列又領紅被逐，無論狀態同信心都可謂低處未算低。

另外，有關曼城易帥大換血消息亦傳到似層層，前線孖寶迪斯高同祖維迪或會打包賣畀祖雲達斯，由於今季幾乎肯定四大皆空，比歷連尼嘅帥位亦危危乎，甚至有傳該隊高層曾密會皇馬教頭安察洛堤添！連同早前高柏尼同隊友費蘭甸奴吵大鑊，問題多多，軍心極其不穩。

同曼城嘅金鑽陣容相比，水晶宮梗係差幾條街喇，不過季中接手嘅領隊柏杜最叻用蔗渣價錢、踢出燒鵝嘅味道，陣中嘅費沙甘保、查馬克、韋費特沙夏等豪門棄將嚟到佢手都大打爭氣波，而杜韋加爾、賓捷安、格連梅利、史巴朗尼等一班蝦兵蟹將，柏帥亦令佢哋重建信心，近10場聯賽狂搶19分，從季初嘅降班鐵膽，變成依家幾近上岸。

接近上岸 水晶宮冇壓力
由於冇乜護級壓力，水晶宮主場唔使踢得太保守。加上佢哋近期對親強隊都特別起勁，無論係反勝熱刺抑或僅敗畀阿仙奴，敢於進攻令場面不落下風，今仗撞正曼城後防穿窿實搵到着數。

另一邊廂「藍月亮」王牌阿古路為爭金靴亦會搏甩髀，拍住韋菲特邦尼同大衞施華搏命搶攻，相信入波一定唔會少，大盤好路。