卡爾萬：光輝1.82倍W咪嫌熱

紐卡素噴射機等收咧
今季澳職常規賽話咁快踢到最後階段，珀斯光輝為爭取更高排名殺入季後賽，贏波鬥心信得過，佢哋今輪造訪「等收咧」嘅紐卡素噴射機，仲有弗爆箭頭占美麥卡倫踢完國際賽歸隊，要開1.82倍客勝話咁易！

（有線64及203周一下午3:00直播）

咪睇珀斯光輝家陣排喺澳職第5位，佢哋上場擊敗西悉尼流浪者，結束9場不勝頹勢後，家陣僅落後「一哥」墨爾本勝利3分，仲有機會爭做常規賽盟主，冇理由唔搏埋佢啫！

搏殺爭常規賽冠軍 占美麥卡倫Fit到震
再講吖，上場因代表「小袋鼠」而缺陣嘅占美麥卡倫，喺國際賽大演帽子戲法勁醒神，今場孖住首席射手安迪基奧治落場數胡，夠晒贏波本錢！

紐卡素噴射機喺澳職包緊艇，季後賽資格一早唔輪到佢哋爭，而且澳職又冇降班制，噴射機今季既然飛唔起，最後幾場隨時Hea踢等收咧。其實睇番呢隊波近況亦曳到震，近12場只係贏過尾2嘅西悉尼咁大把，其中近3場敗仗更全無還擊之力，全部吞蛋輸波收場，今場又有防線主將史葛尼維利養傷，主場出戰睇怕都難頂珀斯強攻，冇本錢亦冇必要阻人發達，捧珀斯光輝客W啱數啦！