雷法爾：拜訪送禮大使柏杜 曼城豬籠入水

隨住阿仙奴同曼聯前日贏波，分別升上聯賽第2、3位，依家曼城莫講話後上爭冠軍，就連直入下屆歐聯分組賽席位都變得唔穩陣。難怪主帥比歷連尼賽前落格殺令，要班手足喺餘下8場聯賽全勝啦！今晚曼城造訪「御用送分大使」柏杜帶領嘅水晶宮，贏少粒都唔制，「藍月亮」讓半一，梗係照撐1.8倍上盤啦！

（now621台周二凌晨3:00直播）

曼城出動大巴 載球迷撐場
據《曼徹斯特晚報》報道，由於英國交通受復活節假期影響，冇直通火車去到水晶宮球場，所以「藍月亮」決定提供6架大型巴士，免費接載3,000位粉絲去史靴斯公園睇波。正所謂為人為到底，曼城梗係想贏波，同隨隊嘅忠心球迷講聲復活節快樂啦！

雖然話佢哋上星期有13件國腳要踢國際賽，但英超賽會好識做，安排佢哋今晚先比賽，等班國腳可以抖足搏殺。近期啞火嘅射手阿古路上仗鬥厄瓜多爾取得士哥恢復信心，加上中場耶耶托尼復出，足夠射爆連續12仗主場有失波嘅水晶宮。

對家水晶宮由領隊柏杜接手後成績雖有改善，可惜佢淨係識欺善怕惡，早前對利物浦同阿仙奴連1分都搶唔到！

水晶宮柏帥 8鬥藍月亮全敗
最重要一點，係柏杜向來對住曼城例牌「送禮」，當佢仲教緊紐卡素嗰陣，聯賽8次鬥曼城全部輸晒，名副其實係送分大使，而且隊長積甸拿克又要停賽，呢鋪仲點惡得出先？再講，水晶宮家陣冇乜降班壓力，球會早前宣布錄得稅前2,300萬鎊盈利後，柏杜自爆已經着手搵新兵為下季鋪路，連主帥都唔多志在呢場波咁款，班球員仲點會同你搏呀！

盤路解碼
曼城今季25場作客賽事，一共開15口入球大。

Data King：藍月亮後備英超最強
?「藍月亮」近7次鬥水晶宮全勝。

?水晶宮連續12仗主場有失球。

?曼城後備今季有16個入球同助攻，為英超最強。

乜都玩錦囊：水晶宮喪攻吼埋大
水晶宮柏杜上任後重組鋒線，大踢進攻足球，佢哋喺13場比賽入面得2仗食白果，除咗前鋒韋費特沙夏連續2場有士哥，射手格連梅利腳風都咁順，近4仗聯賽上陣入4粒，今鋪對住曼城就算輸，都唔似會捧蛋，玩埋1.68倍入球大博雙贏。