珀斯光輝魅力四「射」

珀斯光輝魅力四「射」
 
珀斯光輝啱啱反底，今日喺澳職獨腳戲面對包尾嘅紐卡素噴射機，即使作客都可以投信心一票，畢竟主隊實力明顯同另外9路雄獅有距離，足智彩開讓球盤，珀斯光輝少讓平手、半球上盤有「機」。（周一1，有線64及203台周一3:00pm直播）

紐卡素噴射機上場澳職又輸，喺主場不敵阿德萊德聯，近期只係贏過西悉尼流浪者，目前繼續包尾真係唔怪得人，雖然當地傳媒指噴射機表現已較季初有所改善，不過該隊嘅攻力始終好差，23戰僅入18球，加上祖舒巴里斯、占士域基利同埋雲史特坦繼續養傷，縱使有安祖賀利踢完國際賽歸隊，都恐怕幫唔到噴射機搶分。
珀斯光輝上仗藉祖舒亞列斯頓完場前上演絕殺，喺主場以3:2險勝西悉尼流浪者，終於都止跌回升，雖然迪奧高費拉拿鼠蹊受傷上陣成疑，靴斯又肯定會缺陣，不過球隊今仗有丹尼爾達施華、積克鄧肯同埋占美麥卡倫齊齊復出，實力方面逐步回復完整，有望重演季初嘅高水準表現。

光輝近五次對碰全勝

如果大家仲唔安心捧上盤，可以睇埋對賽往績，珀斯光輝近5次對紐卡素噴射機全部奏捷，包括上年12月贏2:0，建功嘅係李察加西亞同埋尼保查馬連高域，呢兩位球員今日都會列陣，而珀斯光輝近3次作客噴射機亦取得2勝1和不敗，兼夾一球都未失過，對住呢個對手似乎特別有心得，所以今日少讓平手、半球唔買上盤就笨。