曼城作客「宮」無不克

曼城作客「宮」無不克

得番聯賽可以爭，曼城雖然俾車仔拋離，但英超已經成為佢哋必戰之地，餘下比賽一定搏盡，今晚作客近況唔錯嘅水晶宮儘管要讓半球、一球，依然睇好藍月亮可以做齣好戲，上盤搶「宮」。（周一41，now621台周二3:00am直播）

水晶宮上場聯賽作客以2:1擊敗史篤城，近期已累積兩連勝，雖然前鋒基維斯艾比亞被外借至雷丁直至季尾，不過中場希林保定就啱啱同球會續約至2017年。傷兵方面，賴恩安尼斯、謝路美湯馬士、費沙甘保同埋查馬克全部都唔踢得，最重要係隊長積甸拿克要停賽，須知道呢位澳洲國腳係水晶宮嘅罰球專家，冇咗佢的確好濕滯。
曼城喺歐聯被巴塞隆拿淘汰之後，其他盃賽又早早出局，變相只係得番英超可以爭取衛冕，雖然被車路士喺榜首拉開咗差距，但由於領隊柏歷堅尼地位岌岌可危，相信佢都唔想未到季尾就提早執包袱，何況藍月亮上周先以3:0大勝西布朗終止兩連敗頹勢，食住個勢再贏一場唔出奇。

藍月亮火力全開

傳出受到國際米蘭垂青嘅耶耶托尼，賽前有指佢會因傷缺陣，不過亦有消息指呢位科特迪瓦中場可以復出，唔排除只係煙幕，所以曼城肯定缺陣嘅球員只得占士米拿一個，其餘主力包括迪斯高、阿古路、高柏尼、薩巴列達、大衛施華同埋祖赫特都可以候命，另一射手韋菲特邦尼亦取得加盟後嘅處子球，可謂火力全開。
往績方面，藍月亮近3次作客水晶宮錄得全勝，故此足智彩開讓球盤，曼城讓半球、一球至少執半格，上盤絕對捧得過。