人腳鼎盛攻力依然 喜鵲星散捧利物浦Ｗ_東方日報

英超重頭戲紐卡素主場迎戰利物浦，「喜鵲」紐卡素今夏星散，多位主力離隊兼換帥，預料需要一段時間重建，季初實在唔樂觀，利物浦正好乘虛而入，加上近10次聯賽交鋒「紅軍」獲9勝1和，客勝值得追捧。（Now 621及611周日晚11時30分直播）

紐卡素遭受主將流失問題打擊，3位骨幹人物翼鋒安東尼哥頓、中場辛度東拿利、般奴古馬雷斯已經離隊，雖然會方獲得超過2.4億鎊（約26億港元）轉會費收入，但並未有簽入具同樣級數新兵，整體實力大打折扣，近期熱身賽表現差劣，包括不敵愛華頓、利華古遜，上場打和斯特拉斯堡但射輸12碼，連運都冇埋。文:Mic少

人腳鼎盛攻力依然
此外，主帥艾迪侯域上月底突然辭職，會方臨時臨急8月初搵來查斯利領軍，呢位38歲德國少帥之前只係執教過奧地利球隊薩爾斯堡，以及沙特豪門吉達艾阿里，有冇能力喺英超立足實屬疑問，如今要收拾紐卡素「爛攤子」肯定舉步維艱。

至於利物浦雖然亦有射手穆罕默德沙拿離隊，但勝在人腳仍然充裕，阿歷山大伊沙克、域斯等中前場球員近期熱身賽都有波入，狀態不俗。新加盟中堅謝列美查基已傷愈，早前對科木更加取得入球。最重要係新領隊伊拉奧拿屬有料之人，之前執教般尼茅夫都取得佳績，有力提升「紅軍」水平，更何況利物浦一直剋住紐卡素，應可旗開得勝。