科娜 ：巴塞大報復心切

以4分力壓皇馬排緊榜首嘅巴塞隆拿今周可以睇住對手嚟踢，會喺周一凌晨壓軸作客切爾達，首循環喺主場大熱倒灶輸畀切爾達嘅巴塞，今時唔同往日，隊波愈Run愈順，「MSN」美斯、蘇亞雷斯同尼馬繼續拍住上大開殺戒，今場讓切爾達一粒簡直係依絲執，讓球客勝有買趁早！

（now 632、TVB 13周一凌晨3時直播）

美斯出得 阿蘇着火
今次國際賽期嘅「FIFA病毒」唔算太嚴重，巴塞淨係有後衞佐迪艾巴「為國捐軀」，今場缺陣，至於因右腳有傷而未能出戰阿根廷兩場熱身賽嘅王牌美斯，傷勢已無大礙，今場將可正選上陣殺敵，又點使驚巴塞贏唔到兩粒以上？

巴塞今場唔單止要贏波確保領先優勢，仲要報番上次輸波恥辱，巴塞喺首循環不敵切爾達0比1，係自1942年以來首次主場輸畀呢隊波，當時仲未融合到嘅蘇亞雷斯仲畀人話係黑腳。「哨牙蘇」喺上輪西甲做晒英雄，射入致勝球幫巴塞擊敗死敵皇馬，因為停賽關系唔使踢國際熱身賽嘅「阿蘇」依家信心、體力都爆晒棚，同美斯、尼馬又愈嚟愈夾，唔入波交助攻都冇問題呀！切爾達今場有中場馬甸達、奧賓拿及後衞卡利斯柏拿斯未好番，更加靠唔住，主場受讓都唔好掂呀！