循序漸進拍跳3連勝士砵亭 上力剷平 森林_東方日報

下周就要應付葡超開咧嘅士砵亭，最後一場熱身賽約戰諾定咸森林。士砵亭一早已經上晒力，早前接連擊敗多支歐洲實力分子，熱身賽取得3連勝。諾定咸森林由前水晶宮領隊格拉斯拿接手，依家仲係忙緊買人同制訂緊球隊整體方向，備戰態度冇士砵亭咁認真，加上今場喺葡萄牙開戰，相信士砵亭可以再下一城贏波。文:渡邊年

（周六凌晨2時45分開賽）

士砵亭一如往年，去葡萄牙南部阿爾加維進行傳統夏季集訓，雖然唔係喺阿爾瓦拉德球場作賽，但其實同喺主場比賽差唔多。事實上，士砵亭之前幾場熱身賽表現都非常好，先以4比1擊敗些路迪，再7比0大炒斯特拉斯堡，啱啱周日就以2比0小勝摩納哥，球隊循序漸進咁約戰球隊，今場就到上屆歐霸4強分子諾定咸森林。

最後備戰迎葡超開咧
值得留意嘅係，葡超同英超開咧時間唔一樣，士砵亭踢完今場之後，下周就聯賽開咧作客艾馬多拉，相反森林要到8月22日先至喺主場對列斯聯，期間仲要踢多4場熱身賽，兩軍備戰態度同陣容肯定唔同。

諾定咸森林搵嚟水晶宮功勳領隊格拉斯拿接手，佢協助水晶宮贏得英足盃、社區盾及歐協聯3個冠軍，森林球迷都對佢寄予厚望。球隊現時正忙於轉會市場工作，先從RB萊比錫撬走奧地利國腳舒拉加，而且同士砵亭準備完成一宗交易，簽入中堅迪奧文迪（見另文）。格拉斯拿將會利用嚟緊幾場熱身賽，調整戰術框架及球員調配，預料會用唔同球員上陣，對住最後備戰嘅士砵亭，相信難逃一敗。