香川真司倒戈 多蒙特訪櫻花合力做大騷_東方日報

歐洲勁旅多蒙特就去咗日本，首站則同大阪櫻花「拍跳」。「蜜蜂兵團」一向同日本甚有淵源，依家陣中亦有東瀛兵山本天翔，呢類熱身賽志在娛賓，今仗好大機會合演入球騷。文:法達斯維

（Now 638周三晚6時直播）

山本天翔「回家」香川真司倒戈
多蒙特今夏日本之旅會打2場熱身賽，除咗今仗鬥大阪櫻花外，尾站會造訪ＦＣ東京。早喺名帥高普執教嘅年代，多蒙特因為從櫻花引入香川真司大獲好評，成功打開日本市場，而且兩軍已建立合作夥拍關係，多蒙特派專家支援櫻花數據分析，未來櫻花潛力新星將有機會去「蜜蜂兵團」受訓，今番再碰頭，多蒙特有效力二隊嘅日本中場山本天翔隨隊，櫻花亦有香川真司倒戈，勢成焦點。

多蒙特之前踢咗2場熱身賽，先以3比1擊敗奧柏侯遜，之後對住杜塞爾多夫竟輸1比2，當然主帥尼高高華希望藉住「拍跳」志在提升狀態，輸贏係其次。佢哋今次訪日名單中，有射手古拉斯、德國國腳菲歷斯尼美查及麥斯比亞，仲有祖迪比寧咸嘅細佬祖比比寧咸，只係瑞士國腳沙比薩放假未歸隊，陣容算係幾有誠意。

另邊廂，由於日職新一季同以往喺年頭開咧唔同，於下月就要開打與各大聯賽接軌，因此櫻花亦要操弗狀態，絕對唔會hea踢。雙方兩年前先交過手，當時多蒙特險勝3比2，預計今仗都會大手交易。