江原有態反轉安養 FC首爾當弗夠爆蔚山HD_東方日報

今日韓職直播重頭戲，FC首爾主場迎戰蔚山HD。FC首爾今季於聯賽順風順水，於聯賽一放絕塵，相反，蔚山HD愈踢愈沉，此消彼長之下，寧買當頭起，FC首爾主勝咪錯過。（無綫myTV SUPER周日晚6時30分直播）文:法達斯維

講到今季韓職最弗球隊，非FC首爾莫屬，佢哋今季於聯賽順風順水，加上其他列強表現走晒樣，唔單止高踞榜首，仲愈放愈遠。呢支首都球隊近6仗聯賽獲5勝1和，包括上周中快車以3比1擊敗浦項制鐵，依家全隊信心爆晒棚，必定藉住主場之利再搶3分。

相反，蔚山HD表現認真麻麻，連同盃賽在內，近5仗只得3和2負未贏過，包括上周中快車面對實力一般嘅仁川聯，竟於末段遭對手絕殺而輸1比2，嚴重打擊士氣。翻查紀錄，兩軍近3次正面交鋒，FC首爾全部贏晒之餘，仲要上半場已領先，由頭贏到尾擺明格食格，今仗仲唔趁機痛打落水狗咩，主勝有計。

江原有態反轉安養
同時間亦有FC安養主場對FC江原，FC安養係一隊好怪嘅球隊，近6仗作客贏咗5場，反而近8次主場出擊未贏過，絕對係客強主弱。FC江原狀態唔錯，近6仗取得4勝2和未輸過，既然FC安養主場咁弱雞，FC江原勢必反客為主，客勝捧得過。