墨爾本城乘風破「浪」

墨爾本城乘風破「浪」

今日啲聯賽終於返嚟啦！頭場一如以往都係澳職賽事，不過同以往唔同嘅，就係我哋好少用聲音介紹澳職，咁澳職常規賽都殺入直路，都一試無防。而今午兩支對賽隊伍，本來都有番咁上下實力，只係西悉尼流浪者一早放棄咗今屆澳職，專心一致打亞冠，相反墨爾本城呢隊新成立球隊愈打愈似樣，季後賽位置愈來愈穩陣，呢場就算作客一樣夠贏面。（周五1，有線64及203台周五4:40pm直播）

西悉尼流浪者上屆係辛苦嘅，又要打常規賽亞冠又贏埋，成班球員休季時間都幾乎冇休息過，所以今個球季放棄聯賽，等班球員回吓氣都好正常，而亞冠方面打緊分組賽，認真6場波又有一段長時間可以唞唞，不過一隊職業球隊可以悠閒成咁，都真係多得澳職冇降班制度啦！
可能有人會問，咁佢哋聯賽唔輸晒佢！點解間唔中要贏吓先，咁答案都好簡單啫，班主力都要有比賽保持狀態嘅，好似卡斯迪倫等中前場大腦，咪間唔中落吓場囉，等亞冠先至強陣出擊，好明顯就係西悉尼流浪者現時策略。而事實上，咁啱下星期就到亞冠賽事，呢一場西悉尼會有幾認真，相信大家都好清楚。

墨爾本城養好默契
 
墨爾本城今季季初未磨合好，但一上力就唔講得笑，佢哋連贏3場之下，已經拋離獅吼穩守第六位置，而且佢哋有曼城班主作為巨大後盾，實力只會一年比一年強，一陣會唔會又借個林柏特過嚟玩陣真係冇人知，不過就算睇佢哋依家陣容，都非常夠實力挑戰澳職列強，約舒亞堅尼地、基斯諾保都係舊澳洲國腳，高倫等外援都非常好腳法，墨爾本城的確值得殺入季後賽，而現時佢哋已經領先第7位8分，今場贏埋幾乎肯定搶得季後賽資格，鬥志肯定高漲啦！