卡爾萬 ：雙尼爭口氣 三獅狂噬意粉

熱身賽好戲周三凌晨2:45
熱身賽往往被視為練兵試陣嘅好機會，唔少領隊對勝負都唔會睇得太重。但今晚意大利同英格蘭會師都靈就唔同講法，「三獅兵」近兩屆大賽決賽周都成「意粉國」手下敗將，難得對手今次陣容不整，賽前又頻傳壞消息，勢必趁機贏波出番啖氣，首選英格蘭受讓平半下盤，進取啲不妨直吼3.05倍客勝！

（開賽時間：周三凌晨2:45）

英格蘭踏入千禧年後5次同意大利交手，連同歐國盃決賽周及世界盃決賽周兩度落敗，埋單得嗰1勝4負，成績認真麻麻。之不過「三獅兵」今時唔同往日，計埋日前喺歐國外大炒立陶宛，至今已經連贏7場，勁轟15球僅失2球，無論攻守都畀到人極大信心。

史達寧 韋碧克退隊
雖然英格蘭今場賽前有箭頭史達寧同韋碧克退隊，但隊長朗尼喺國家隊腳風極順，正劍指卜比查爾頓「三獅首席士哥拿」稱號嘅佢，已經連續5場國際賽入波。加埋新進國腳哈利卡尼演出標青，上場處子登場就取得首個入球，今場有「雙尼」掛帥踢雙箭頭，絕對有力扭轉近年鬥意大利唔掂嘅命運。

意大利近期頻傳負面消息，最大鑊莫過於足總主席達維基奧爆料，中場馬治斯奧因右膝十字韌帶撕裂退隊後，領隊干地收到球迷死亡恐嚇，嚇到佢手騰腳震。上場歐國外作客保加利亞更疑似受影響，最終倒灶和波失分，有意媒甚至指干帥覺得心灰意冷，考慮係咪再教落去。

意大利排擠「外人」士氣差
姑勿論干地係咪唔想教落去都好，今場殘陣應戰就係鐵一般事實，除咗馬治斯奧因傷退隊，派路、蒙杜利禾同迪羅斯等經驗戰將亦冇入選，搞到中場缺乏領軍人物。更何況意國鋒線全屬「新丁」，未必孭到飛唔在講，艾達馬田斯同法蘭高華斯基斯兩名歸化國腳，亦慘被意國傳媒同球迷排擠，話希望國家隊可以搵「百分百純正意大利人」，咁搞法，有得落場都冇心機踢啦。「意粉國」士氣低、人腳差，點頂氣勢如虹嘅「三獅兵」呀？

Data King：英格蘭7連勝僅失2球
?英格蘭已7連勝，豪取15球僅失2球。

?雙方近6次對決全部開出「半場和」。

?意大利近4次主場單雙單跳，最近1次主場為「入球單」。

乜都玩錦囊：鶴臣穩陣派再追半和
英格蘭近年畀意大利食住，即使今場挾住7連勝強勢出戰，又撞啱意大利陣容不整，相信領隊鶴臣都唔敢貿然搶攻，隨時延續雙方近6次對決半場例和嘅「傳統」，一於再追1.95倍「半場和」。

盤路解碼
英格蘭近8場開出7次「半場細」。