法達斯維 ：意大利客W有保證

干地急召歸化兵 鋒線打補針
歐國盃外圍賽烽煙四起，4屆世盃盟主意大利今晚將會喺H組作客保加利亞，由於「藍衣兵團」火力麻麻，今次特登召入兩名中前場歸化兵艾達馬田斯同法蘭高華斯基斯，但畀「小器鬼」國米教頭文仙尼鬧爆佢哋冇資格，人要面樹要皮，撞正4戰不勝頹爆嘅保加利亞，艾達馬田斯必定用士哥帶來贏波予以還擊，斯維力撐意大利客W。

（有線64及203台周日凌晨3時45分直播）

小器文仙尼乘機抽水
雖然自前祖記鐵帥干地接手意軍後，連熱身賽在內取得5勝1和佳績，算係一洗巴西世盃分組賽出局嘅頹風，但前線火力唔夠嘅問題依然未解決，干帥曾試用恩莫比尼、施蒙尼沙薩、加斯安奴柏利、迪斯度、艾沙拉維、奧卡卡卓卡等唔同前鋒配搭過，可惜效果都未如理想，堂堂4屆世盃盟主，面對馬爾他同阿爾巴尼亞等弱旅都只係贏得1粒咁大把，都咪話唔肉酸。因此，今次干帥決定向「歸化外援」埋手，召入巴西裔前鋒艾達馬田斯同阿根廷裔攻擊中場法蘭高華斯基斯等，希望為疲弱不振嘅前鋒線注入新動力。

點知此舉惹來非議，當中小器記仇嘅國米教頭文仙尼就乘機抽水，話唔係意大利出世嘅人冇資格披上藍色戰衣，擺明係嬲剛喺聯賽被森多利亞前鋒艾達馬田斯絕殺啦！其實意大利一向都有用歸化兵，06年世盃冠軍功臣甘莫蘭尼斯就係最佳例子，而且艾達馬田斯今季喺聯賽有9球進帳，法蘭高華斯基斯亦有7粒士哥，而且9次助攻更係意甲第1，狀態咁弗冇理由唔用。

保加利亞近況曳爆
保加利亞今非昔比，貝碧托夫5年前已退出國家隊，曾効力曼城嘅前鋒保積洛夫算係陣中較有名氣嘅一位，而呢位有多年意甲經驗、現時効力意乙特爾納納（Ternana）嘅名將將成為保國鬥意軍嘅「盲公竹」。保加利亞連熱身賽近4仗未贏過，實力同狀態都曳爆，就算有地利都信唔過。現時意大利喺H組排第2，但只多第3嘅挪威1分，為鞏固頭兩名直接殺入決賽周嘅入場券，艾達馬田斯同法蘭高華斯基斯亦想證明自己，今仗唔會腳軟，意軍客W有1.75倍，值得捧場。

艾達馬田斯
年齡：28

出生地：巴西

位置：前鋒

球會：森多利亞

本季意甲數據：9入球、3助攻

法蘭高華斯基斯
年齡：26

出生地：阿根廷

位置：攻擊中場

球會：巴勒莫

本季意甲數據：7入球、9助攻