歐聯：地頭龍拿玻里當車仔冇到_東方日報

英超兵車路士，則於今輪歐聯作客拿玻里。車仔自新帥羅仙尼亞上任後確有起色，但對手偏弱唔好睇得佢哋咁高，加上撞正「記仇舊帥」干地，要贏唔易，「讓球主客和」寧捧拿玻里讓球主勝（+1）。（Now 638周四凌晨4時直播）文:法達斯維

記仇干地倒戈更落力
車路士喺元旦日同馬利斯卡協議分手，並從衞星球隊斯特拉斯堡內部調升其主帥羅仙尼亞。「羅Sir」接手後，車仔各項賽事錄4勝1負，睇落唔錯，但再仔細啲睇，所贏嘅對手係查爾頓、賓福特、帕福斯同水晶宮，「水分」甚高。如果有睇過呢幾場波嘅球迷，都會覺得車路士表現唔算標青，當然佢哋都想贏波保住前8，取得直入16強資格，但唔係你想贏就一定贏到。

最弊係車路士要對住由舊帥干地領軍嘅拿玻里，干地出晒名記仇，以往同祖記、車仔、國米都不歡而散，因此每次倒戈經常分外落力。拿玻里近8仗3勝4和僅1敗之餘，主場出擊特醒，今季各項賽事主場未輸過，包括3場歐聯獲2勝1和，加上佢哋只得8分排第25位，雖然與前面幾隊同分，但萬一今仗未能取勝，就接近完全喪失第9至24位附加賽資格，論戰意唔比車仔輸蝕，「讓球主客和」仲有得受讓咁筍，讓球主勝（+1）咪錯過。