歐聯：賓菲加主場惡受讓抵捧_東方日報

兩支擁有極豐富歐洲賽底蘊嘅球隊對碰，賓菲加主場迎戰皇家馬德里。賓菲加主帥摩連奴曾經執教過「銀河艦隊」，有知己知彼作用，而且有傳聞指皇馬會長皮里茲想搵「寸王」回巢，今場有「送禮」嫌疑，而且賓菲加主場近況勇猛，近4場全勝，受讓半一下盤玩得過。（周四凌晨4時開賽）文:渡邊年

今場波談論焦點多多，皇馬之前炒嘅沙比阿朗素同依家教緊嘅艾比路亞，全部都係摩連奴執教皇馬時嘅球員，而且盛傳艾比路亞只係過渡性質，皮里茲好想搵摩連奴回巢，唔少球迷都話，全靠當年「寸王」打靚基礎，令之後嘅安察洛堤同施丹可以稱霸多屆歐聯，更有調查指，超過7成皇馬球迷支持「摩佬」回歸。

皇馬王牌麥巴比缺操
睇番依家形勢，皇馬數字上只要和波就肯定直接殺入16強，即使輸波都唔一定跌出前8，所以存在失分空間，相反賓菲加今場一定要全取3分先至有機會踢附加賽，心態上確係秤高少少。

皇馬會唔會放水當然眾說紛紜，但周一已經放風，話今季歐聯射入11球嘅前鋒基利安麥巴比缺陣操練，係咪會缺陣就真係開波嗰吓先知。不過睇埋賓菲加近來表現，確實有支持理據，除咗真係要搶分，佢哋近6次主場不敗，當中近4場全勝，包括歐聯以2比0擊敗拿玻里，今場有力喺皇馬身上搶分，受讓半一值捧。