澳職：FC悉尼穩字派半和落重本_東方日報

今日下午澳職獨腳戲，墨爾本勝利主場鬥FC悉尼。「墨勝」近期表現時好時壞，就算有地利亦唔好睇得咁高；FC悉尼客場例穩陣行先，初段隨時陷入膠着，一於捧半場和。（無綫myTV SUPER周一下午2時40分直播）文:路西法

墨爾本勝利飄忽難靠
「墨勝」經過差勁開局後，隨住西班牙中場桑馬達逐漸融入，上年年尾踢出一段「小陽春」，聯賽連贏4場，可惜近2仗又先後輸畀西悉尼流浪者及阿德萊德聯，演出略嫌飄忽。「墨勝」最大問題係防守欠穩，近6仗得1場冇失波，其中近3仗更加先失守，後防咁唔集中，主場出擊亦不宜高估。

相比之下，FC悉尼演出較為穩定，近5仗取得3勝1和1負，因此位居前列亦好合理。不過要留意佢哋近3場只入3球，攻力麻麻，加上射手祖羅利因傷倦勤，預料會先做好防守，而呢瓣正正係佢哋強項。FC悉尼目前12輪聯賽僅失9粒，係今季澳職唯一失波維持單位數嘅球隊，尤其客場更加穩字行頭，今季8次作客，有6次上半場同對方握手言和，今仗照樣守住半場唔輸，易邊後先嚟料，半場和不妨再追。