歐聯：雷斯倒戈帕福斯半和頂得住_東方日報

英超勁旅車路士，今晚歐聯於主場迎戰塞浦路斯球隊帕福斯。「車仔」表現飄忽，新帥羅仙尼亞初來甫到又未熟環境，梗係以不變應萬變，但以舊將大衞雷斯為首嘅帕福斯防線，守得兩嘴，初段頂得住「車仔」搶攻，半場和有計。（Now 638周四凌晨4時直播）文:法達斯維

車仔近期表現飄忽
車路士頭6輪歐聯錄3勝1和2負，唔算標青，要爭前8直入16強席位仍需努力，新帥羅仙尼亞喺接手後，雖然獲得2勝1負，但佢匆匆上任唔敢搞咁多嘢，最緊要班大帝踢得開心。加上「車仔」近期表現飄忽，門將羅拔山齊士喺英聯盃4強首回合輸畀阿仙奴兩度自爆，上仗聯賽贏賓福特又屢救險球，同班波一樣估佢唔到。

帕福斯今屆初登歐聯大舞台，頭6輪取得1勝3和2負，包括打和摩納哥同擊敗維拉利爾，「新丁」嚟講絕對唔失禮，而且陣中有曾兩度效力「車仔」嘅老將中堅大衞雷斯鎮守防線，「爆炸頭」經驗豐富兼對舊東家太了解，有助鞏固防線，單計近4輪歐聯，有3次開半場和，可見其先求穩陣嘅打法。帕福斯依家位處中游，仍有機會爭取踢附加賽，唔會hea踢，「車仔」初段未必咬得入佢哋，半場和有逾3倍分頭博得過。