歐聯：國米阿仙奴細均力敵_東方日報

狀態大勇 VS 防守之王
歐聯重頭戲，國際米蘭對阿仙奴，亦係意甲同英超「一哥」對決。國米喺歐聯賽事特別小心，今屆6戰僅失4球，而且近7次歐聯對英超球隊全開2球或以下；至於「槍手」不但6戰全勝高踞榜首，更係今屆歐聯防守之王，至今僅失1球，今仗作客有力全身而退，首選2.5球入球細。（Now 638周三凌晨4時直播）文:邪神

現時歐聯聯賽階段形勢，阿仙奴揸住18分，躋身前8名直接晉級16強應無問題，至於國米手執12分，想爭前8位置仲未穩陣，需要搶分，預計今場會較肉緊，不過要擊敗今時今日嘅阿仙奴談何容易。

國米係上屆亞軍，今屆捲土重來當然想更進一步，而且近況唔錯，近9場意甲8勝1和，前鋒拿達路馬天尼斯上場對烏甸尼斯又入波，連續7季入球「15+」，狀態冇得彈，不過弊在佢哋對上兩場歐聯都輸波，包括1比2輸畀馬體會，同埋0比1輸畀利物浦，對住實力更強嘅阿仙奴，今場主場都要受讓，可見贏波難度甚高。

槍手下仗鬥曼聯唔敢谷
另邊廂，「槍手」上場聯賽被森林悶和0比0，出盡8大攻擊手都入唔到波，但巧合嘅係兩支聯賽競爭對手曼城同維拉齊齊輸波，計落反而賺咗1分；再睇佢哋賽程，今場對完國米，下場返到聯賽就要對「魔性回歸」嘅曼聯，主帥阿迪達又要計數，既然歐聯出線在望，今場避重就輕唔出奇，以佢哋防線硬淨程度，相信國米好難咬得入，合演一場深夜「細」波非常合理。