非國盃：藉地利盼搔50年之癢 非洲王者撐摩洛哥_東方日報

非國盃決賽爆發！冠軍寶座由主辦國摩洛哥及前屆冠軍塞內加爾爭奪。摩洛哥人材輩出，近年各梯隊於國際賽事都取得好成績，今屆晉級過程只失過1球，加上塞內加爾有主力停賽影響實力，摩洛哥有望憑主場之利一搔50年之癢捧盃，推介主隊「冠軍」。（Now 643周一凌晨3時直播）文:渡邊年

兩軍陣容都星味十足，摩洛哥有耶辛尼保奴、夏基美、安尼斯利及巴謙戴亞斯，其中效力皇家馬德里嘅巴謙戴亞斯暫以5球高踞射手榜首，至於塞內加爾則有沙迪奧文尼、尼高拉斯積遜及艾度亞度文迪。

塞內加爾兩主力停賽蝕章
不過今場渡邊年就睇好摩洛哥可以捧盃，翻查紀錄，最近7次有東道主殺入非國盃決賽，6次都成功奪冠。其實唔難理解，當一個國家取得大型賽事主辦權，當地政府同足總肯定會大搞足運配合，事實上摩洛哥不同梯隊近年於國際賽事都取得好成績，包括2022世界盃殺入4強，2024年巴黎奧運贏得銅牌，去年U20世界盃更成功封王，實力已經係國際一線。

有「特蘭加雄獅」之稱嘅塞內加爾殺入決賽，過程中未受強隊考驗，喺準決賽對埃及僅勝1比0，說服力不足，今仗遇上主場之利嘅摩洛哥更加難打。最大問題係，塞內加爾中堅隊長高列巴尼以及中場哈比迪亞拉要停賽，嚴重影響實力，摩洛哥喺大批球迷支持下，「冠軍」值得支持。