英足盃：費查「救火」遇真正考驗_東方日報

曼聯今圈英足盃面對白禮頓，兩隊今季成績都麻麻，曼聯主帥魯賓艾摩廉落鑊後，由費查頂上做「救火隊長」。講真呢位「臨時主帥」頂到幾耐？上場對般尼接手後，今晚先係真正考驗。文:謝德謙

隨時要鍊到互射12碼
曼聯近排踢波有種「好似幾醒但又唔太掂」嘅味道，聯賽連環和局，防線幾乎場場有失波，齋睇數據就知，近10場得1次保清白身，今晚後防仲要缺少馬菲斯迪歷特，靠哈利馬古尼復出打救，球迷又要準備定「救心」。好消息係般奴費南迪斯及美臣蒙特等猛將傷愈復出，至少唔會完全冇創造力。

白禮頓方面上場逼和曼城踢出驚喜，主力麥斯韋化及阿當韋斯達仲養緊傷，但祖爾費特文有機會復出，防線算係補番少少血。佢哋最大賣點係快速反擊，面對曼聯鬆散後防，只要把握機會，唔係冇條件爆冷。歷史上曼聯曾6次喺英足盃淘汰白禮頓，不過近年交手，白禮頓絕對唔輸蝕，英國分析都話今場要有加時甚至互射12碼嘅準備。

事實上曼聯今場唔單止要求贏波晉級，更關乎費查可唔可以穩住軍心，為嚟緊連場大戰打好基礎；白禮頓就一於趁對手立立亂，博做「冷門製造機」。