意甲：干地倒戈有仇報仇 拿玻里讓客得米_東方日報

今晚意甲壓軸大戰，國際米蘭主場硬撼拿玻里。國米雖然位居榜首，但今季遇強冇甜頭，撞正「極品前任」干地領軍嘅拿玻里，勢必吃盡苦頭，拿玻里受讓必捧讓球客勝（+1）。（Now 638周一凌晨3時45分直播）文:法達斯維

國米遇強即屈
國米今季喺主帥捷禾帶領下算係平穩過渡，對住實力較弱球隊多數食硬，呢個係佢哋排榜首嘅主因。不過國米面對強隊就冇乜符，除咗贏過羅馬外，無論歐聯對馬體會、利物浦，抑或聯賽對祖記、拿玻里同A米，全部未贏過，被批評遇強即屈，好多時贏形勢但失分，欠缺冠軍球隊應有嘅霸氣。

另邊廂，拿玻里教頭干地雖然喺2020至21年度球季帶過國米重奪意甲冠軍，但之後不歡而散，轉教拿玻里後經常「食住」舊東家，唔單止上季幫拿軍力壓國米封王，今季首循環交手贏3比1後，干地即寸爆捷禾冇「吉士」，非常搶口。

睇番雙方近4次碰頭，拿玻里獲1勝3和未輸過，其中3次係干地領軍，對親舊東家都冇面畀，加上依家落後國米4分，為爭冠呢場「6分波」不容再失，讓球客勝（+1）咪錯過。