英超：穩中求勝Vs協防逼搶 阿仙奴鬥紅軍半場細有計_東方日報

今晚英超快車壓軸大戰，由「1哥」阿仙奴主場硬撼利物浦，「兵工廠」雖然近期失波多咗，但穩字行頭嘅風格未變，由加比爾馬加希斯拍住威廉沙列巴鎮守中路，絕對係後防信心保證。「紅軍」之前輸到慌晒，踢法亦轉趨保守，預計大家今仗初段都唔敢輕舉妄動，中位數1.5球半場細有計。

（Now 621及611周五凌晨4時直播）文:法達斯維

阿仙奴今季堅決執行穩中求勝嘅策略，有睇開波嘅球迷都會feel到，儘管佢哋今季20輪聯賽入咗40粒，但好多比賽嘅過程係有啲悶，限制對手進攻更係重中之重，難怪至今「兵工廠」僅失14球，單計近5仗全勝嘅聯賽當中，有4次都只係贏1粒，真係贏波大過天，場面擺埋一邊。

大衞拉耶屢獻神救
防線中路拍檔加比爾馬加希斯同威廉沙列巴，雖然今季曾輪流受傷及有「自爆」場面，近期失波亦多咗，幸好佢哋大部分時間都表現穩定，能給予隊友同球迷好大信心，仲未計屢有神救嘅門神大衞拉耶，因此阿仙奴甚少初段失波，佢哋各項賽事近10仗，只有2次上半場有失波，當中有9次半場開1球或以下，防線堅硬程度，可見一斑。

另邊廂，利物浦吸取早前連敗教訓後，主帥施洛為保命，亦只好無奈地叫停進取打法，近期踢番穩陣波，中前場球員要勤於協防或做逼搶，保護今季經常出事嘅中堅華基爾雲迪積克同伊巴希馬干拿迪，雖然表現只係一般般，但戰績總算能夠止跌回穩，各項賽事近9仗獲5勝4和未輸過，其中8次半場開1球或以下，同樣初段注重防守。既然大家都先求穩，相信初段都會大放悶蛋，捧1.5球半場細好路。