非國盃：眾星夾落冇火花唔敢谷 科特迪瓦虛張聲細_東方日報

今晚上演最後兩場非國盃16強激戰，上屆冠軍科特迪瓦壓軸登場，同布基納法索爭晉級。論星味科特迪瓦無疑秤先，但佢哋今屆臨場表現只屬一般；布基納法索踢法實而不華，有力同對手抗衡，翻查雙方近6次正式賽事交鋒，5次總入球開2球或以下，博中位數2.5球嘅入球細。（Now 643周三凌晨3時直播）文:Mic少

科特迪瓦陣容相當鼎盛，坐擁曼聯翼鋒阿密特迪亞路、RB萊比錫新星恩迪奧文迪，及阿士東維拉前鋒古斯辛特等多位效力歐洲球會嘅猛將。可惜呢班球星夾埋一齊就冇乜火花，小組僅勝弱隊莫桑比克1比0，打和喀麥隆1比1，最後一輪落後2球劣勢下，踢到補時先入波，驚險以3比2反勝小組包尾嘅加蓬，缺乏衞冕球隊應有嘅霸氣。加上嚟到淘汰賽，一場過定生死，預料科特迪瓦都唔會冒進，以免被對手偷襲，一旦落後隨時冇仇報。

布基納法索夠硬淨
布基納法索今屆3戰錄2勝1負，當中敗仗僅以0比1不敵爭標勁旅阿爾及利亞，踢法硬淨表現唔失禮。事實上佢哋都有唔少球員效力歐洲球會，包括新蘭特前鋒貝特蘭查奧爾、賓福特前鋒丹高奧達拉、利華古遜後衞塔蘇巴，人腳質素並非同科特迪瓦相差太遠，預計今場好可能出現膠着局面，大家都要有耐性等對方犯錯，入波唔會多。