沙特職：唔放過搶盃仇人吉達 C朗磨利刀艾納斯大報復_東方日報

沙特職上演重頭戲，吉達艾阿里主場迎戰艾納斯，雙方上年8月訪港喺沙超盃決賽交鋒，法定時間打和2比2，最終吉達憑互射12碼勝出，破壞C朗捧盃美夢。艾納斯今季處於巔峰，勢必強攻對手報仇，加上各項賽事近7場有6場總入球開4球或以上，首選中位數3.5球嘅入球大。（on.cc東網周六凌晨1時30分直播）文:Mic少

論今季聯賽成績，第4位吉達艾阿里的確唔及榜首艾納斯，但呢隊波嘅人腳陣容，喺沙特職球隊之中都係屬於數一數二，包括擁有英格蘭射手艾雲東尼、巴西前鋒加連奴、法國中場安素米洛特等猛將，即使鋒線馬列斯、中場基斯爾離隊踢非國盃，攻力仍然有保證。

艾雲東尼今季聯賽上陣8場入5球，射術足以媲美C朗，加連奴上仗貢獻2次助攻，踢法極具侵略性，呢對鋒線拍檔勢必對艾納斯後防構成重大威脅。

沙特豪門入得失得
至於艾納斯開季首10場聯賽全勝，直至上仗被伊蒂法克逼和2比2，先至斷纜，但並唔代表狀態回落。事實上，進攻方面仍然相當銳利，巨星C朗已經連續9場聯賽上陣入波，祖奧菲歷斯踢10場聯賽亦有12球進帳及3次助攻，可見呢兩位葡萄牙國腳踢沙特職超晒班，恐怕吉達艾阿里防線難以招架。不過，艾納斯防守並唔穩陣，今場未必可以保持清白之身，最好博3.5球嘅入球大。