阿占：馬體會無敵主場o趙利華

上屆歐聯亞軍馬德里體育會，若然要躋身歐聯8強，今晚就必須喺主場擊敗利華古遜。雖然首回合輸0:1形勢落後，不過教練施蒙尼經驗豐富，絕對唔會輕易冒險瘋狂搶攻。以馬體會喺歐聯主場超過500分鐘不失球嘅超強防守力，今場只要把握到一、兩次機會，就可以贏波晉級，我對1.6倍主勝好有信心。

（有線62及202、中央5台周三凌晨3:45直播）

主場518分鐘冇失波 分組賽3戰入10球
馬體會上季殺入歐聯決賽，同施蒙尼硬朗同效率兼備嘅足球思維大有關係，尤其主場出擊佢哋甚少甩拖。睇番今屆分組賽，3場主場全勝，攻入10球0失球，都咪話唔犀利！原來馬體會已經連續5場歐聯主場賽事不失，合共超過518分鐘冇失波，今場可以話係立於不敗之地。

除咗防守掂，前線仲有文迪蘇傑同基沙文兩把尖刀。「空中霸王」文迪蘇傑德甲打滾多年，對利華古遜熟晒路，況且佢今屆踢歐聯特別醒神，分組賽入咗5球，係隊中首席射手，同傳得又射得嘅基沙文拍住上，打反擊或陣地戰都有把握，就算今場有堤亞高文迪斯同高甸停賽都冇問題。

利華古遜首回合以體力化嘅硬朗踢法對付馬體會，成功攞到1:0領先優勢，今場作客理論上保住勝果就搞掂。不過利華古遜向來都係攻叻過守，如果今場走去玩死守，相信頂唔得幾耐，尤其是中堅史柏希斯經常發波瘟，今場隨時變成球隊嘅計時炸彈呀！

頂占筍盤：馬德里體育會（勝）