沙特職：班底雄厚唔齊腳都夠殺 吉達艾阿里客W有辦法_東方日報

沙特職早場，艾法特對吉達艾阿里，艾法特近期3連敗，狀態低迷，主場都捧唔過，吉達艾阿里係沙特豪門，上屆亞冠精英盃冠軍，實力有保證，就算有個別主力離隊去踢非國盃，但仍然夠殺，加上佢哋近5場作客全勝，有力反客為主，捧客勝一齊拆禮物。（on.cc東網周五晚9時05分直播）文:邪神

先睇吉達艾阿里現有人腳，受非國盃影響，塞內加爾門將艾度亞文迪、阿爾及利亞翼鋒馬列斯、科特迪瓦中場基斯爾都入選所屬國家隊而暫時離隊，不過球隊勝在實力雄厚，上場亞冠精英盃作客大勝SC艾索達5比0，英格蘭前鋒艾雲東尼、巴西中場羅渣伊賓尼斯同加連奴等外援都有入球進帳，證明整體戰力未有減弱，反而更搶韁更想入波。

艾法特3連敗難靠
上場亞冠盃大勝，吉達艾阿里亦提前兩輪取得出線資格，佢哋可以更專注踢好本土賽事，佢哋聯賽9戰5勝4和，係今季沙特職三支不敗球隊之一，而且近期作客戰績甚佳，5連勝之餘僅失1球，捧客勝令人放心。

艾法特曾於2012至13球季爆冷奪沙特職冠軍，但之後無以為繼，近年在中下游徘徊，今季聯賽9戰僅得1勝，現時排第16位，對上一場比賽已經係3個多星期前，在沙王盃1比4大敗於希拉爾腳下出局，連同聯賽累積3連敗，今屆非國盃佢哋亦有前鋒沙度尤素夫代表科摩羅而缺陣，陣容買少見少，對住實力分子吉達艾阿里，輸波屬意料中事。