非國盃：摩洛哥冬至大飽口福_東方日報

兩年一度嘅非國盃今晚揭幕，A組由東道主摩洛哥打頭陣迎戰科摩羅。摩洛哥剛奪阿拉伯盃士氣高昂，必定食住個勢，藉地利劍指冠軍，不過今場主W偏熱冇肉食，對住入得又失得嘅科摩羅，一於轉捧2.5球大盤。（Now 639周一凌晨3時直播）文:法達斯維

摩洛哥足球近年發展穩步上揚，繼2022年世盃獲殿軍後，2024年奧運勇奪銅牌，今年U20又喺世青盃爆冷擊敗阿根廷封王，啱啱又喺阿拉伯盃決賽加時以3比2險勝約旦奪冠，依家世界排名第11位，更加係「非洲1哥」，加上有主場之利，毫無疑問係今屆非國盃奪冠大熱。「阿特拉斯雄獅」陣中既有經驗豐富嘅夏基美、馬沙拉奧、蘇夫恩岩拉伯特，亦有巴謙戴亞斯、基斯甸泰比、沙巴利等後起之秀，好多都喺歐洲各大聯賽站穩陣腳，就算隊長夏基美剛傷愈今仗未必上陣，但靠其他隊友都夠殺。

科摩羅踢法有前冇後
另邊廂，科摩羅實力當然遠遜摩洛哥，但佢哋喺非國外表現突出，於A組力壓突尼西亞獲得首名出線。科摩羅近4場1和3負明顯跌Watt，但入7球卻失12球，全開3球或以上，踢法有前冇後，包括喺月頭阿拉伯盃以1比3輸過畀今仗對手摩洛哥，可見佢哋唔玩死守，2.5球入球大不容錯過。