非國盃：３雄各有優勢冠軍熱捧東道主_東方日報

曾效力車路士嘅沙洛文卡勞，歷來為科特迪瓦上陣多達97次，2015年協助「大象兵團」稱霸非國盃。呢位名將認為東道主摩洛哥、塞內加爾及家鄉科特迪瓦屬今屆熱門之選，不過卡勞最終撇除「私人情感」，向大家推介摩洛哥。文:沙洛文卡勞

摩洛哥主場優勢非凡
喺非洲國家盃歷史上，主場優勢往往扮演重要角色，摩洛哥除咗呢方面有着數外，更擁有夏基美及耶辛尼保奴等世界級球星，而且他們過往31場只曾輸過3場，明顯為錦標做足準備。

塞內加爾陣容夠均衡
塞內加爾擁有全非洲最豪華兼平衡嘅陣容，坐擁艾度亞文迪、高列巴尼、伊斯美拿沙亞及尼高拉斯積遜等球星，當然唔少得老大哥沙迪奧文尼，前中後３線都有孭飛球員，加上有贏過非國盃嘅寶貴經驗，毫無疑問屬最強勁挑戰者。

科特迪瓦靠新星突圍
作為衞冕之師，科特迪瓦實力自然唔曳，上屆喺主場奪冠嘅過程雖然跌宕起伏，但現時「大象兵團」湧出多位矚目新星以及一位出色嘅領隊，若然球員磨合得宜，絕對有力左右大局。

我個人主觀願望當然想科特迪瓦能夠成功「冧莊」，但分析賽果時必須拋開私人情感，經過反覆思量後，認為集天時、地利、人和嘅摩洛哥將難以被撼動，係今屆冠軍心水之選。